யுகபாரதி

Archive for ஜூலை 3rd, 2010

சொல்லவேண்டாம்

Posted by யுகபாரதி மேல் ஜூலை 3, 2010

நம்முடைய நியாயங்கள்
அவர்களை நிராகரிக்கச்சொல்லவில்லை
மாறாக அவர்களின் பிறழ்வை
நினைவூட்டுகின்றன

நம்முடைய முழக்கங்கள்
அவர்களை காயப்படுத்தும் தந்திரமில்லை
மாறாக அவர்கள் படப்போகும்
வலிகளை பறைசாற்றுகின்றன

நம்மை அவர்களுக்கு
நம்முடைய உண்மைகளால்
பிடிக்காமல் போகிறது

நம்மை அவர்கள்
அலட்சியம் செய்வதுபோல
அதிகமும் கவனிக்கிறார்கள்

ஒரு நேர்மையும் இல்லாமல்
வறட்டுப் புகழ்ச்சியில்
தங்களை தாங்களே சாகடிக்கும்
செயலில் ஈடுபட்டுக் கொண்டிருக்கிறார்கள்

இருக்கும் பதவியும்
கிடைக்கும் சௌகர்யங்களும்
நாளையும் தொடருமென்று நம்புகிறார்கள்

யாரைப்பற்றியும் யோசியாமல்
எளிய மனிதர்களை வஞ்சிக்கிறார்கள்

எத்தனையோ படித்திருப்பதாகவும்
எல்லாமும் வசப்பட்டுவிட்டதாகவும் கருதி
வாழ்வதில் போதையுறுகிறார்கள்

அவர்களுக்குத் தெரிவிக்க வேண்டியதில்லை
அவர்களே அறிவார்கள்
தருக்கித்திரிந்த சமஸ்தானங்களெல்லாம்
தரைமட்டமான கதை

Posted in கவிதை | குறிச்சொல்லிடப்பட்டது: | Leave a Comment »

 
Follow

Get every new post delivered to your Inbox.

Join 92 other followers